我最鍾意食肉餅，仲揸車周圍去搵肉餅食。由蒸到煎，由咸魚到梅菜，連煲仔飯都一定要叫肉餅煲。但係點解有沙爹牛肉麵關注組，連芫荽同燒賣都有關注組，偏偏無肉餅關注組丫？你話呢個世界公平咩？所以今集開始，我會帶大家周圍去搵肉餅食，你知既，你唔知既都會一一介紹。
第一集帶大家去一間既出名，又有免費泊車既餐廳，就係屏山老地方。
唔好睇佢鋪頭細細，但係叫得自己做肉餅專門店，一定唔會失體。大家睇吓個餐牌，真係你諗得出既肉餅都有呀。以前啲飲食雜誌就專登介紹佢既生果肉餅系列，話啱晒女士們夠Fresh夠Juicy喎。而我每次黎都淨係叫一款，就係六重芝士煎肉餅飯喇。
大家睇到既只係表面，其實佢係有兩大塊肉餅，上面嗰塊佈滿住邪惡既芝士，而下面嗰塊肉餅就將芝士溶埋咗落去肉餅度一齊煎。所以呢一個飯有兩種不同芝士肉餅食法。睇相可能你唔覺，現實中，我同我太太無一次去食既時候係食得晒啲飯。所以大家都係集中進攻佢嗰兩塊芝士，飯係配菜黎咋！
屏山老地方
地址：元朗屏山塘坊村32-33號地下
電話：23043288
屏山老地方設有專用免費停車場，位於上面地圖左手邊公廁附近（按我導航）
直接泊入去上圖鐵欄入面個停車場就可以，免費任泊，無論外賣還是堂食都歡迎，裏面有數個註明係屏山老地方既專用車位，唔好泊錯。
跟住泊邊好搵食自駕遊，下集再帶你食好嘢！！
