西九文化區 | M+博物館優先睇 | 六大展區 | 必睇打咭推介 | 排隊攻略 (附泊車一覽)

M+博物館已經喺2021年11月12日開幕,但係原來Y爺係VIP可以優先入場,仲帶咗以下既精彩相片等大家可以入場之前預先了解。提提大家,去M+博物館係要預約嘅,香港市民可以喺首一年內免費入場,所以唔好同人逼,唔駛同人急。

M+博物館入場預約網址:按此連結

M+博物館開放時間:
星期二至四、週末及公眾假期:早上10時至下午6時
星期五:早上10時至晚上10時
星期一:休館


M+博物館的開幕展由六個專題展覽組成,體現了M+館藏的各個重點領域,展示博物館由2012年開始蒐羅的M+藏品系列內的視覺藝術作品、流動影像作品、設計品、建築項目、檔案藏品。這些展覽分別為:

  • 香港:此地彼方
  • M+希克藏品:從大革命到全球化
  • 物件・空間・互動
  • 個體・源流・表現
  • 安東尼・葛姆雷:亞洲土地
  • 博物館之夢

我地由大堂開始出發:

我知大家都好想睇艾未未嘅作品,上面呢一個叫《洗白》。其餘嘅作品,我都唔敢post,大家都係入場睇啦。而下面嘅藝術品,非常之震撼。係由英國藝術家安東尼‧葛姆雷邀請咗300幾位廣州市花東鎮嘅村民,製作出近二十萬個泥人。而二十萬個泥人有幾大呢?睇下面:

答案係超過幾萬平方呎,大到成個展覽廳比佢霸晒,不過你只可以喺呢個位望入去。然之後,下面呢個藝術品,係Y爺最期待嘅一個,亦係推薦大家必去,因為每人只可以睇30秒咋,好巴閉。

唔好睇少呢張枱,據聞佢係花咗一千五百萬港幣喺日本東京新橋嘅清友壽司吧度買番黎。每人限睇30秒咋,呢30秒值$1500萬,係必睇嘅項目,而到公開入場嘅時候,我估要排長龍先入到。

繼續參觀其他展覽廳,不過呢度真係好大,要行晒真係要兩三個鐘。

下面係同香港有關嘅展區。

香港係水上人起家嘅,所以上面呢件藝術品就將屋同船結合為一。而下面嗰幅其實係片而唔係相黎,所以喺現場睇嗰陣,真係好有現場嘅感覺。而呢個畫面究竟係香港嘅邊座樓?大家可以估吓,提示係香港島區嘅。

跟住有當代嘅展區,而最代表到呢個年代嘅,竟然係emoji。

呢個係一個投射畫面嘅藝術品,所以全間黑房就用黎睇呢個投射。

如果叫大家幫手為呢件藝術品改名,呢個電視中的我對住電視中的我應該叫咩名?

呢個好笑,係遊戲世界中的香港。

上面白色線條嘅呢個你估唔估到係乜?比少少提示你,中間下面嗰個係港澳碼頭 (下面長長嗰條咪係噴射船上落嘅位置囉),當你睇得出之後,左手邊一支支音叉咁嘅就係中環港外線碼頭喇。

呢度有地方比你畫吓嘢同寫吓野。

至於呢幅作品真心要拎出黎貼堂!!勁正!!


除咗睇藝術品之外,M+博物館喺G/F同B1層都設有藝術小店,一齊黎睇埋先走丫,首先有喺B1層嘅M+小舖,呢度嘅特點就係將藝術同設計融入生活之中,呢度嘅產品都係既有藝術又有實用,係實而不華嘅,有啲你睇樣都未必知係乜嘢黎添。準備好就一齊黎黎參觀吓啦。

有冇啲好似MUJI嘅感覺?不過係唔同嘅,呢度每一件產品都有佢嘅故事,亦都係集設計同藝術於一身。我哋逐件睇吓。

呢度係用舊布製成藝術品嘅產品,另外香港南丫島出名嘅藍染工作坊嘅產品呢度都可以買到架。

跟住有M+聯同本地藝術家製作嘅產品,件件都好有本地嘅特式。連個水樽都設計到好似隻USB手指咁。

呢度係兒童圖書嘅區域,聽店長講呢度啲書好受家長歡迎。原因係呢度啲書好啱小朋友閱讀,例如立體書,或者一啲講調色嘅書。一邊學英文之餘又一邊可以自細培育藝術嘅觸覺。以於下圖呢件產品,你又估唔估到係乜嘢黎?

開估喇,其實上圖呢兩筒入面嘅係蠟筆黎架!佢係由日本設計師設計嘅,佢唔單止係以堤壩形狀製成嘅蠟筆咁簡單,你睇清楚。佢係可以比小朋友好容易咁就畫到平衡線,同埋好輕易咁畫到圓形嘅。又有設計又實用咪呢啲囉。

原來依家仲有菲林相機賣,仲話好好賣添。好賣到連菲林都已經無晒貨得番相機有得賣。你仲記唔記得點入菲林?仲記唔記得影完相要手動拉菲林?無錯,因為佢真係全手動嘅菲林相機而唔係自動相機。影晒36張之後仲要自己圈菲林架!

作為一個文青,簡約嘅生活就唔少得架喇。咁所以當然要響應環保,用幾多買幾多啦。呢度你可以自備樽仔黎買洗頭水沖涼液等等,亦可以喺呢度買唔同設計嘅樽架。

之後下面呢款錶賣到咁貴,你又知唔知有乜嘢咁特別?

開估喇,佢其實係設計俾盲人使用嘅手錶黎架!喺未有智能手錶之前,盲人就係靠錶面同錶旁邊嘅兩粒鋼珠去摸時間,其實等於你睇到鋼珠嘅位置就知幾點一樣。咁下面呢一樣你又估唔估到係乜?

又開估,其實呢個係集設計、實用同懷舊於一身嘅產品。上面白色嘅部份係黑膠唱盤,而下面橙色嘅部份就係喇叭,仲要係一個藍芽喇叭,可以獨立使用嘅。即是話當你買咗返屋企之後,你想播黑膠又得,當藍芽喇叭用又得。呢啲咪design囉。

喺呢間鋪嘅角落有呢間花藝品店,仲有呢一塊以海洋為主題嘅花牆俾你打咭影相添。由於泊邊好仲未有女主持嘅關係,我諗大家無興趣睇我哋自拍架喇,所以淨係睇花啦。

最後,你見到呢度嘅畫,唔好似為真係賣畫咁普通喎。你呢度見到嘅相同畫,喺M+博物館入面係有展出嘅作品黎。係咪即刻覺得好抵買呢?

行到攰,呢度仲有間CURATOR Creative Cafe俾你嘆住咖啡望吓海景順手思考吓人生。另外,佢仲設有室外嘅座位區,等你可以吹吓海風添。

M+小舖
位置:西九文化區,M+博物館B1層

揸車嘅朋友想知去西九文化區泊車泊邊好?請參閱呢篇文章。而想去M+小舖嘅朋友當然可以考慮直接泊入去F區停車場啦。

註:M+小舖購物不設免費泊車。


跟住仲有位於G/F層嘅M+本店 The M+ Shop

一入到黎,有冇啲好似去咗誠品嘅感覺?咁當然唔係香港嗰幾間啦。

同M+小舖唔同嘅地方,就係本店呢度有本地藝術家製作嘅手飾賣,仲要唔太貴添。另外仲有家居擺設,例如燈咁。

M+本店 The M+ Shop
位置:西九文化區,M+博物館G/F層

揸車嘅朋友想知去西九文化區泊車泊邊好?請參閱呢篇文章

註:M+本店購物不設免費泊車。


M+博物館入場預約網址:按此連結

M+博物館開放時間:
星期二至四、週末及公眾假期:早上10時至下午6時
星期五:早上10時至晚上10時
星期一:休館

#西九文化區 #尖沙咀 #親子自駕遊