西九文化區 | M+博物館親子文青遊 (附泊車攻略)

雖然M+博物館就仲未開幕,要2021年11月12日先開,但係原來位於M+博物館B1層嘅M+小舖已經偷偷開業,呢度嘅特點就係將藝術同設計融入生活之中,呢度嘅產品都係既有藝術又有實用,係實而不華嘅,有啲你睇樣都未必知係乜嘢黎添。準備好就一齊黎黎參觀吓啦。

首先,因為M+博物館仲未開幕嘅關係,想去M+小舖就要由室外嘅玻璃門入。

有冇啲好似MUJI嘅感覺?不過係唔同嘅,呢度每一件產品都有佢嘅故事,亦都係集設計同藝術於一身。我哋逐件睇吓。

呢度係用舊布製成藝術品嘅產品,另外香港南丫島出名嘅藍染工作坊嘅產品呢度都可以買到架。

跟住有M+聯同本地藝術家製作嘅產品,件件都好有本地嘅特式。連個水樽都設計到好似隻USB手指咁。

呢度係兒童圖書嘅區域,聽店長講呢度啲書好受家長歡迎。原因係呢度啲書好啱小朋友閱讀,例如立體書,或者一啲講調色嘅書。一邊學英文之餘又一邊可以自細培育藝術嘅觸覺。以於下圖呢件產品,你又估唔估到係乜嘢黎?

開估喇,其實上圖呢兩筒入面嘅係蠟筆黎架!佢係由日本設計師設計嘅,佢唔單止係以堤壩形狀製成嘅蠟筆咁簡單,你睇清楚。佢係可以比小朋友好容易咁就畫到平衡線,同埋好輕易咁畫到圓形嘅。又有設計又實用咪呢啲囉。

原來依家仲有菲林相機賣,仲話好好賣添。好賣到連菲林都已經無晒貨得番相機有得賣。你仲記唔記得點入菲林?仲記唔記得影完相要手動拉菲林?無錯,因為佢真係全手動嘅菲林相機而唔係自動相機。影晒36張之後仲要自己圈菲林架!

作為一個文青,簡約嘅生活就唔少得架喇。咁所以當然要響應環保,用幾多買幾多啦。呢度你可以自備樽仔黎買洗頭水沖涼液等等,亦可以喺呢度買唔同設計嘅樽架。

之後下面呢款錶賣到咁貴,你又知唔知有乜嘢咁特別?

開估喇,佢其實係設計俾盲人使用嘅手錶黎架!喺未有智能手錶之前,盲人就係靠錶面同錶旁邊嘅兩粒鋼珠去摸時間,其實等於你睇到鋼珠嘅位置就知幾點一樣。咁下面呢一樣你又估唔估到係乜?

又開估,其實呢個係集設計、實用同懷舊於一身嘅產品。上面白色嘅部份係黑膠唱盤,而下面橙色嘅部份就係喇叭,仲要係一個藍芽喇叭,可以獨立使用嘅。即是話當你買咗返屋企之後,你想播黑膠又得,當藍芽喇叭用又得。呢啲咪design囉。

喺呢間鋪嘅角落有呢間花藝品店,仲有呢一塊以海洋為主題嘅花牆俾你打咭影相添。由於泊邊好仲未有女主持嘅關係,我諗大家無興趣睇我哋自拍架喇,所以淨係睇花啦。

最後,你見到呢度嘅畫,唔好似為真係賣畫咁普通喎。據聞你呢度見到嘅相同畫,就係將來M+博物館入面會展出嘅作品黎。係咪即刻覺得好抵買呢?

行到攰,呢度仲有間CURATOR Creative Cafe俾你嘆住咖啡望吓海景順手思考吓人生。另外,佢仲設有室外嘅座位區,等你可以吹吓海風添。

M+小舖
位置:西九文化區,M+博物館B1層

揸車嘅朋友想知去西九文化區泊車泊邊好?請參閱呢篇文章。而想去M+小舖嘅朋友當然可以考慮直接泊入去F區停車場啦。

註:M+小舖購物不設免費泊車。

#西九文化區 #尖沙咀 #親子自駕遊