大家等咗好耐，比亞迪嘅元Plus終於推出國際版（即係右軚版）。呢個版當然就唔係為咗香港而製作嘅，佢個目的地係澳洲，不過好彩香港有代理引入咗。仲邀請咗我地去睇車添。
電池容量：50kWh (細電版) / 60kWh (大電版)
續航距離：400公里 (NEDC細電版) / 480公里 (NEDC大電版)
摩打動力：150KW (約203匹)
摩打扭力：310Nm
0-100公里：7.3秒
先講吓外表，佢係Dragon Face既設計，即係用龍黎做主題，咁中國車黎講，用龍都好合理嘅，至少唔係中國紅或者香檳金先丫。單睇外型，唔講你知係BYD，其實個樣都睇得吓既。不過最特別反而係佢個內籠，因為內籠係用健身運動黎做主題。講到內籠，唔可以唔介紹Mr. Paganetti，佢係BYD內飾總設計師，Ben-Z嘅S Class同遊艇都係由佢設計。
首先呢個叫做啞鈴設計既出風口，叫有design過而又實用啦。出風口下面係無線叉電黎架 (只適用於大電版)。
設計師話，音樂唔只聽得仲要睇得，所以佢將個喇叭整成一個結他咁。而音樂當然要自己有得參與先好玩架嘛。所以個結他係真係彈得嘅。問你服未。
全架車全型應該係中控台嘅呢個MON，佢可以垂直扮Model S又得，打番橫扮Model 3都得。我個人就覺得垂直時最方便係用Dual-Apps上下分割，一個睇地圖一個聽音樂就一流。
呢個唔係天幕，而真係天窗黎，前半部係開得架。你睇吓後坐幾闊樂，坐到Y爺幾興奮？
講番硬件野，可能大家聽到大陸車就無乜信心。真既，幾年前既BYD的士，揸到的士大佬都驚驚。不過呢幾年BYD真係進步咗好多，首先佢自主研發既刀片電池，又薄身又唔易燃。所以中國車唔一定會爆炸既，佢都驚咗呢樣。再加上電池黎講BYD都真係十分出名，依家連英國本土行駛緊既雙層巴士都係用BYD架。
最後最重要嘅係想話比大家知，呢部車既電池係終身保用嘅。所以唔擔心將來要用十幾廿萬黎換電。同樣，亦唔需要擔心二手價錢會跌得好勁。
BYD ATTO3
車價（一換一後）：$238,000 (細電版) / $263,000 (大電版)
以上價錢是2022年5月1日前之價錢。5月1日後將會加價。
代理商：JC Motor Limited
地址：新界元朗宏業西街20號雄偉工業大廈地下D室
電話：6928 6226
