註: 本文係教你泊香港口岸轉金巴既流程。如果你想知道點樣申請直接揸車去澳門的話，請參閱 "乘電車跨過大海｜揸車去澳門好容易｜申請方法、最平保險介紹｜一文全攻略" 。 港珠澳大橋 > 離境篇 (往澳門) 先睇吓地圖講解下香港口岸既停車場先。港珠澳大橋香港口岸人工島共有5個停車場， 而可供預約（日泊／時租）既私家車停車場只得P2及P3兩個，P4係輕型客貨車預約停車場。P5係的士預約停車場。而最近旅檢大樓既P1停車場係不設預約既時租停車場。好明顯。P1係用黎比你上落客用。所以P1係有30分鐘免費泊車時間的。如果想預約既話，去呢個網址>> https://hzmbparking.com.hk/zh-hk (日泊收費$208/24小時) 泊好車，呢度有條扶手電梯，港珠澳大橋口岸同香港機場個設計基本上一樣，上層係出境，下層係入境。 一入到大樓，有幾間商店，就好似下圖咁，其餘乜都無，可以直接過關。 過咗香港海關之後，先去大堂中間既售票處買金巴車票。單程$65一位。（夜間單程收費為$70） 由於呢度仲係喺香港境內，所以你可以用八達通或信用咭比錢。 買飛後，出去室外排隊上金巴就可以。記住睇清楚你係去澳門定珠海，有兩個獨立月台候車的。 金巴車程大約35-45分鐘。有別於其他陸路口岸，你過左香港海關之後其實仲係喺香港境內範圍，不過，一上巴士嗰刻已經係用左軚駕駛方法行車，所以將來南車北上既朋友要小心！首先，你會沿住條路兜番去民航署總部後面既公路，然後會穿過觀景山隧道 (即係昂平360轉向站山邊嗰條隧道），再之後會沿住機場邊出海直達海珠澳大橋。 一落車，眼前就係澳門海關，順帶一提。澳門海關同珠海海關其實係兩座相連既大樓，就好似香港機場T1同T2航廈咁，行幾步就到，詳請睇回程篇詳細再講。 離開海關之後，就去到呢個巴士總站，前往市區既巴士線喺左手邊，而右手邊係賭場巴士。而其實最最最左手邊，仲有個月台，係比香港直接去澳門既港澳一號等直通巴士上車的。另外，由呢度乘搭去氹仔的賭場巴士係需要喺氹仔機場轉車的。所以無論你去氹仔任何一間酒店都可以搭同一班車，去咗氹仔機場先，再轉車時揀清楚你要去既酒店專車。 講番收費巴士方面。呢度一共有兩條前往澳門市區既巴士線，分別係去澳門市既101X（即係大三巴、新馬路及葡京一帶）同埋去氹仔既102X（即係官也街）。當中101X係24小時運作的，而102X則由上午６時至零晨１２時。小編親身試過搭102X去氹仔，需時約30分鐘。兩條巴士線既車費都係$6。 港珠澳大橋 >> 回程篇 (返香港) 由於小編係由氹仔回程，所以乘搭102X返黎港珠澳大橋澳門口岸。呢度同香港一樣，上層係離境，下層係入境。一落車，眼前呢座就係澳門海關大樓喇。 入到去左手邊行到盡，就會見到售票處，由於呢度係澳門範圍。所以今次唔可以用香港八達通比錢，反而可以用澳門通。可以接受港幣比錢，不過我諗大家用信用咭會方便啲。 買飛之後，沿地下既指示圖行，就可以去到上圖呢個分叉路。上文講到，澳門同珠海海關其實係兩座相連既大廈，所以你可以由呢度行番去珠海海關入境大陸，即係同時澳門離境兼大陸入境一次過做晒。調番轉，你可以喺珠海海關出境行過黎澳門海關入境都得。 我當大家返香港咁計，轉右就會去到澳門海關櫃位，出境返香港喇。 出咗隧道一陣，就黎到大橋既香港範圍。所以地下終於寫繁體字。另外，香港範圍有一樣香港常見既道路設備，就係雀籠（測速相機），你預咗有龍門架就有一部相機，好密架！！特別小心強風既日子，車速限制會由100改為50，一個唔小心，就扣分兼停牌！ 落車後，沿往香港既牌進入旅檢大樓，過完香港海關就可以行番出去巴士站、的士站同埋停車場。 港珠澳大橋出入境攻略： 去港珠澳要留意時間，上午係由珠海去香港既高峰期。所以呢個時間出發去澳門或珠海就最少人； 下午至黃昏就係去珠海既高峰期，所以唔好呢個時間離境； 如果你真係有需要去珠海，但係又太多人等金巴的話，其實你可以先搭去澳門，再用我上面既方法，入境澳門後，上一層去番出境大堂，行番去珠海海關嗰邊做出境澳門同入境珠海手續。(大前提係，你有權入境澳門，香港出世既朋友一定無問題啦，其餘既朋友要自己留意） （按我導航至P2停車場）

先講清楚，如果你係想帶寵物出黎玩的話，只有啟德跑道公園係寵物共享公園。而啟德郵輪碼頭公園係寵物不可進入的。 啟德跑道公園位於前啟德機場跑道的末端，係喺郵輪碼頭大樓外面嘅，好似下面張相咁。 呢度有個1.5公頃的大草坪比你帶小朋友或者寵物黎放電就啱晒，依家因為大家都無得去旅行，仲多咗黎人露營同野餐添，呢度24小時開放架。 而啟德郵輪碼頭公園係位於郵輪碼頭大樓既天台，兩個公園係獨立的。提提大家，呢個天台係睇唔到煙花的。因為有煙花時係會封天台的，而郵輪碼頭內嘅其餘地方都無位睇到煙花。 啟德郵輪碼頭公園 / 啟德跑道公園泊車泊邊好？呢度暫時得一個停車場咁大把。記住呢度係唔可以泊車過夜的，夜點11前一定要離場。 1. 啟德郵輪碼頭停車場（按我導航）雖然呢度得一個停車場，位又唔算好多，但係好多時佢滿咗都照比你入泊走廊的。另外，呢度價錢其實唔算貴，時租$10 / $15，價錢請參閱泊好先。唯一好處係有Tesla Supercharge。 2. 啟匯 Harbourside HQ 停車場（按我導航）啟匯係一座新起嘅商廈，所以大量車位，時租又平，星期六日只需$10一個鐘，仲有日泊$60，你話抵唔抵先。不過呢度你唔會行去郵輪碼頭咁遠架喇，最盡你行去兒童醫院轉小巴或巴士去啦，車程都係4分鐘，是但一部巴士見車就上就可以。停車場價錢詳情請參閱泊好先。 3. 觀塘碼頭一帶如果你星期六日去郵輪碼頭的話，仲可以考慮泊喺觀塘碼頭一帶，例如觀塘碼頭廣場停車場、振萬廣場停車場等。再喺觀塘碼頭轉渡海小輪去郵輪碼頭。船程只需10分鐘，每小時逢15分開出一班；回程每小時逢25分鐘由郵輪碼頭開出直達觀塘碼頭。渡輪詳情請參閱運輸署網頁。 #各區公園泊邊好 #九龍東 #寵物自駕遊 #親子自駕遊

我一直都以為尖東個寵物商場會開先，點知比廣東捌拾爬咗頭。廣東捌拾有名你叫，佢地址係尖沙咀廣東道68-80號一樓至三樓。呢個商場嘅賣點係以80年代嘅香港懷舊風格為主題，另外，位於三樓嘅第二人生體驗館更加係全港首個劇本殺遊戲添，一路睇落去啦！ 1/F 市集及食肆 1/F 係市集區域，就好似今年年頭嘅大乾爹市集就係喺呢度舉辦架喇。而依家就有十多間市集形式嘅小店畀大家購物。 而 1/F 嘅另一邊就有兩個小食店，分別係德國熱狗同埋長洲角酪，兩間都係人氣小食店黎架。 今時今日，講乜都係假，最緊要打咭。所以呢度嘅裝修連枱椅都係以80年代嘅香港做藍本，再配合幅牆做backdrop，完全滿足晒你打咭嘅要求。 2/F miniMART 香港超市 雖然佢叫做超市，但係就唔係話好大亦唔係你心目中嗰種超級市場。你當佢係759同Donki形式嘅店鋪咁啦，都係以賣日式零食、化粧品及清酒等等為主。 3/F 第二人生體驗館 呢個第二人生體驗館就真係值得花時間為大家介紹吓。佢係一個以劇本殺（即係真人角色扮演遊戲）方式去玩嘅遊戲。遊戲一開始，其中一位玩家就會係兇手，所有玩家可以喺現場實境搜證同埋與其他玩家交換資訊；每個玩家當然都有佢自己嘅秘密但係唔好畀人知道；真相只有一個！搵到兇手或者兇手成功逃脫遊戲就會結束。係一個鬥智鬥力仲要考你膽量嘅真人角色扮演遊戲，所以只限18歲以上人仕參與。 廣東捌拾Cantonyama位置：尖沙咀廣東道68-80號營業時間：星期一至四12pm-9pm、星期五至日12pm-10pm 廣東捌拾Cantonyama泊車泊邊好？由近至遠講，近一定貴，遠有好選擇。 1. 海港城港威大廈停車場，有泊車優惠。（按我導航） 2. 中港城停車場，時租價錢貴海港城港威大廈一元，但有日泊優惠，星期六日日泊只需$80。（按我導航） 3. 中間道停車場 H Zentre，雖然遠少少，但係H Zentre做緊泊兩小時或以上，無條件免費一小時優惠，無需登記，無需消費，抵掛?（按我導航） #尖沙咀 #最新市集 #區區泊邊好 其餘熱門泊邊好文章：大嶼山自駕遊泊車泊邊好?D2 Place滿晒附近泊車泊邊好？港外線碼頭搭船去離島玩泊車泊邊好？全港Donki尋寶地圖海洋公園泊車泊邊好The Wave /...

香港單車館公園位於將軍澳寶康路105-107號，佔地約5.3公頃。園內有廣闊嘅草坪和人工湖，仲可以畀你放搖控船添，呢度景觀優美。公園另設有多項康體設施，包括極限運動場、露天劇場、緩跑徑、運動攀登牆、兒童遊樂場，長者健體園地等等，唔少得嘅當然係喺單車館外租單車踩去海濱甚至係康城啦。 呢黎介紹呢個大草地夠晒畀小朋友跑跑跳跳。 仲有呢個都幾大嘅兒童遊樂場。 呢度有得租單車，同用Apps租嗰啲比就一定係貴喇架喇。但係話晒都係dup頭車，用shimano波箱、碟剎。好似離咗題添。 將軍澳公園 / 香港單車館公園泊車泊邊好？ 將軍澳運動場停車場（按我導航）最近就當然泊番佢旁邊個運動場停車場啦，不過都幾貴星期六$12 / 星期日$18 係半小時唔係一小時呀！所以想平就過條天橋，去下面介紹嘅尚德停車場喇。而將軍澳運動場停車場收費請參閱泊好先。 TKO Spot停車場（按我導航）TKO Spot即係尚德商場嘅新名。我知大家實會問點解唔介紹香港單車館停車場，明明又近又平。啱呀，佢真係平，但係因為佢太平，假日收費竟然十蚊都唔駛。咁所以你都無謂浪費時間去排，入面大把車係當月租咁泊。講番TKO Spot，想去將軍澳公園記得係泊去 A停車場同埋泊到上三樓，一出就見到條天橋，對面就係將軍澳公園。時租收費$21 / $24；仲有12/24小時泊。價錢詳情請參閱泊好先。 東港城 East Point City停車場（按我導航）位置距離計，南豐廣場同連理街都近過東港城。不過東港城車位足又平過晒其餘周邊嘅停車場，反正將軍澳係天橋之城，泊完車穿條天橋就去到南豐，咁梗係泊東港城啦，另外東港城仲可以用The Point積分換領免費泊車。時租收費$15 / $18。價錢詳情請參閱泊好先。 #香港各大公園 #親子自駕遊...