香港單車館公園位於將軍澳寶康路105-107號，佔地約5.3公頃。園內有廣闊嘅草坪和人工湖，仲可以畀你放搖控船添，呢度景觀優美。公園另設有多項康體設施，包括極限運動場、露天劇場、緩跑徑、運動攀登牆、兒童遊樂場，長者健體園地等等，唔少得嘅當然係喺單車館外租單車踩去海濱甚至係康城啦。 呢黎介紹呢個大草地夠晒畀小朋友跑跑跳跳。 仲有呢個都幾大嘅兒童遊樂場。 呢度有得租單車，同用Apps租嗰啲比就一定係貴喇架喇。但係話晒都係dup頭車，用shimano波箱、碟剎。好似離咗題添。 將軍澳公園 / 香港單車館公園泊車泊邊好？ 將軍澳運動場停車場（按我導航）最近就當然泊番佢旁邊個運動場停車場啦，不過都幾貴星期六$12 / 星期日$18 係半小時唔係一小時呀！所以想平就過條天橋，去下面介紹嘅尚德停車場喇。而將軍澳運動場停車場收費請參閱泊好先。 TKO Spot停車場（按我導航）TKO Spot即係尚德商場嘅新名。我知大家實會問點解唔介紹香港單車館停車場，明明又近又平。啱呀，佢真係平，但係因為佢太平，假日收費竟然十蚊都唔駛。咁所以你都無謂浪費時間去排，入面大把車係當月租咁泊。講番TKO Spot，想去將軍澳公園記得係泊去 A停車場同埋泊到上三樓，一出就見到條天橋，對面就係將軍澳公園。時租收費$21 / $24；仲有12/24小時泊。價錢詳情請參閱泊好先。 東港城 East Point City停車場（按我導航）位置距離計，南豐廣場同連理街都近過東港城。不過東港城車位足又平過晒其餘周邊嘅停車場，反正將軍澳係天橋之城，泊完車穿條天橋就去到南豐，咁梗係泊東港城啦，另外東港城仲可以用The Point積分換領免費泊車。時租收費$15 / $18。價錢詳情請參閱泊好先。 #香港各大公園 #親子自駕遊...

位於深水埗區的南昌公園於1998年7月啟用，佔地約3.83公頃。園內設有草坪、兒童遊樂設施及長者健體設施。仲要24小時開放，仲要喺市心咁方便，係帶埋小朋友去放電/野餐嘅好地方。 唔同時候去可以影到唔同嘅花，二月至三月去就可以影黃花風鈴木，開花期得兩星期咋！ 南昌公園另一個賣點，就係佢呢個接近二萬呎既大草源，除咗維多利亞公園之外，九龍區黎講呢個算大，黎野餐就一流。 去南昌公園泊車泊邊好？ 1. V Walk（按我導航）V Walk既免費泊車優惠出名要求出，不過只要你係The Point會員，就可以用1500分換一個鐘免費泊車，近近地就揀佢泊啦。價錢詳情請參閱泊好先。 2. 南昌停車場 （按我導航） 係南昌停車場，唔係南昌薈停車場，隔咗一條欽洲街的。其實南昌停車場即是南昌邨。呢邊少人泊好多，加上較為近南昌公園。所以呢個基本上係首選。價錢詳情請參閱泊好先。 3. 南昌薈停車場（按我導航）南昌薈係典型屋村多層停車場，超多位，不過車位就窄啲，泊到上最高就無死，反正有Lift唔駛行。佢仲有12/24小時泊，如果你打算野餐玩全日嘅就啱晒。價錢詳情請參閱泊好先。佢個停車場入口喺條村最入嗰個位，你由欽州街西入去西村路行到尾就會見到下面個閘，入閘之後直行就會見到多層停車場，直接上到最頂啦。 南昌公園地址：九龍深旺道20號 #各區公園泊邊好 #區區泊邊好

唔好誤會，九展泊車泊邊好唔係偽名題。真係好多人問去九展泊車泊邊好。原因係散場嘅時候，九展門口可以塞你半個鐘以上，如果嗰日唔好彩撞正幾間公司春茗再加個演唱會，真係行路快過揸車。有見及此，本文就教大家行多兩步搵個停車場避塞車。 1. E-max 九龍灣國際展貿中心 (九展) 停車場（按我導航）首先一定要介紹返九展停車場嘅，價錢平車位多，仲有Tesla Supercharge。除咗散場驚塞車之外，絕對係首選。時租價錢$20，仲有免費泊車優惠。 2. 億京中心露天停車場（按我導航）係露天嗰個，唔係室內嗰個呀。泊呢個場嘅好處係，你出同入都可以避開九展，由宏展街入宏基街出，完美避晒。另一個好處係佢逢星期六日全日泊只需$110，就可以泊到零晨12點。即係你下午去泊行埋街食埋飯，睇show時encore再encore都唔怕。時租收費係$27 / $22 (商業區係調番轉，星期六日平過閒日架)；閒日日泊$155。 3. 億京中心停車場（按我導航）同上一個介紹嘅億京中心露天停車場只係旁邊，不過室內就梗係貴啲架啦，星期日全日泊要$135，星期一至六仲要$205添，九龍灣工業區本身都唔夠位係咁上下貴。時租收費係$31 / $27。 4. 創豪坊停車場 （按我導航） 創豪坊星期一至日都應該有位既，不過星期日假錢特平，仲有日泊。所以假期黎可以考慮。 5. 金利豐國際中心停車場（按我導航）如果你話最緊要平，行多幾步都唔介意的話。全九龍灣星期六日時租最平應該係呢個，時租$12，記住要由臨利街入。閒日時租價錢為$20 (19:00後就$14)，無日泊，不過閒日唔駛黎，唔會有位。 如果閒日的話，全個九龍灣除咗Megabox夠多位之外，其餘你都預佢會全滿。夜晚當然會好啲，不過你去得九展又唔會泊到去一號九龍咁遠，所以本文介紹兩個億京就夠晒你用，而金利豐其實好少時租位，不過佢咁平所以即管講埋咁解，我哋都唔覺有人會真係泊去金利豐行路去九展咁有型。 另外，有啲人會選擇泊宏天廣場，因為佢自成一角，所以唔怕無位。但係由九展行去宏天廣場好轉折，行去金利豐一條直路反而仲好行。有興趣嘅朋友可以自行選擇。 #E-Max #九龍東 #區區泊邊好

「沙田翠谷映流霞，西風人瘦過誰家，陶令風流鍾子意，黃花紅酒醉龍華。」唯靈題。 龍華酒店嘅乳鴿就馳名百年，近期仲換咗大廚添，好似話好咗好多。點都好，香港有間過百年歷史嘅酒店都值得大家去回憶吓嘅。今集教大家去龍華酒店泊車泊邊好。 龍華酒店泊車泊邊好？ 1. 龍華酒店代客泊車（按我導航）首先要介紹嘅當然係佢本身嘅代客泊車啦。每日晚上六時至十一時任泊只需$40。非常抵泊。唯一缺點係要留匙，你明架啦。 2. 瀝源商場停車場（按我導航）位置黎講，瀝源會近過禾輋嘅，不過啲人話禾輋多位啲。無所謂啦，都係同一條街，瀝源無位咪再去禾輋囉。都係領展屋村場，都係差唔多......窄架喇。價錢詳情請參閱泊好先。 #沙田 #泊邊好 #搵食自駕遊