高先電影院都開咗幾個月，但係原來好多人都仲未知間戲院喺邊，亦唔熟嗰頭邊度有得泊車。咁泊邊好當然要幫吓你啦，不過你要有心理準備，堅尼地城多地獄場喎。 首先講咗地址先，高先電影院位置係堅尼地城吉席街2號。簡單講就係吉席街同北街嘅街口。電話係+852 2151 1226。 1. 美暉大廈停車場（按我導航）美暉大廈停車場算正正常常，位置算近又唔太貴。時租$18 / $20，星期一至五仲有日泊。呢度好多年都無加過價喇。《收費詳情》 2. 海怡花園停車場（按我導航）其實心水清嘅朋友就會知道吉席街2號咪就係海怡花園囉，而海怡花園自己都有停車場，做乜唔介紹咗先？因為海怡花園停車場收費較貴，$23一小時，另外就係佢嘅地獄指數達4粒星。上落車道超窄，仲要勁多柱，入到去好似去咗竹林深處咁，車位又窄，聞說有啲位你睇到但係唔會泊到，有啲位泊到落唔到車。你想挑戰吓嘅可以一戰，如果無興趣挑戰嘅請睇泊邊好YouTube Channel嘅 地獄遊記 - 海怡花園。《收費詳情》 3. 堅尼地城停車場（按我導航）亦即係有啲人叫佢做〝士美菲路市政大廈停車場〞。呢度係全堅尼地城最多位最正常嘅場仲要係政府場添，所以都幾經常爆滿，時租收費$13，相當抵泊。但係可能地區問題啦，加上政府場都係少許窄架喇，不過勝在夠光猛同啲位睇到就一定泊到咁滯，所以都非常值得大家一試，可惜去睇戲就遠咗少少，當行街啦。《收費詳情》 其餘熱門泊邊好文章：大嶼山自駕遊泊車泊邊好?D2 Place滿晒附近泊車泊邊好？港外線碼頭搭船去離島玩泊車泊邊好？全港Donki尋寶地圖海洋公園泊車泊邊好The Wave / 觀塘工業區 泊車泊邊好？

風之塔公園雖然開咗十多年，但係佢位於香港仔避風塘南邊，景靚又可以順手坐街渡去香港仔，都係幾有趣嘅體驗黎，特別係喺市區成長嘅小朋友，依家搭船嘅機會都唔多，莫講話街渡添。 呢度有個細細嘅遊樂場，但係黎得呢度都唔係為咗佢，有就算啦。 再行過少少有呢個表演場地，疫情前都好多地區活動搞嘅，依家就當櫈坐啦。 呢度仲有個室內嘅常設展覽，介紹造船業嘅歷史，免費入場架！ 終於講到戲肉，風之塔。可惜依家因為要興建電梯而暫時封閉。等我為大家介紹吓佢先啦，佢係一座真係可以畀你行上去既觀景台，高10米。外形就好似一艘傳統漁船。行上觀景台就可以望晒成個香港仔避風塘景色。而呢座塔有個特色就係佢有個會因為當時風速而變色嘅電子指示燈，當風速超過一定速度時就會禁止遊人上塔。而最勁嘅係，呢個電子指示燈係用太陽能發電嘅。十年前黎講好勁架喇。 香港仔 - 鴨脷洲街渡 喺風之塔公園旁邊，你會見到呢個〝碼頭〞，就可以搭街渡去對面岸嘅香港仔海傍。船程唔駛5分鐘，船費只需$2.5咋！如果香港仔塞車或者停車場無位，泊過黎鴨脷洲再轉街渡過去香港仔，計番都有著數丫。 鴨脷洲風之塔公園泊車泊邊好？ 1. 鴨脷洲海濱長廊停車場（按我導航）最近又最平就梗係爛地停車場啦，呢個場都幾唔起眼，無乜招牌，你去到仲以為係街市嘅上落貨區。價錢詳情請參閱泊好先。 2. 悅海華庭停車場（按我導航）唔想部車晒就泊室內場啦，都係好近碼頭，仲有日泊同24小時泊。泊完去香港仔嘅朋友就一流。價錢詳情請參閱泊好先。 #南區 ＃其他泊邊好文章 #公園

首先要講明，曾咀其實係無停車場的。不過呢度嘅保安員係容許並且會指引你泊喺路邊，所以你可以話呢度係免費泊車，亦都無入閘機，如下圖。 呢度大大話話都可以泊到過百部車，所以閒日黎都唔需要太擔心，不過由2021年9月8日開始，揸車前往曾咀必須先去食環署網頁預約 (Vehicle Accessing Booking function (fehd.gov.hk))。可供預約嘅日期為你出發前 1 日至 14 日內，而每一日都有指定時段，由朝八至晚六，每一個小時為之一段。另外，如果你喺春秋二祭嘅時候黎，通往曾咀既道路係會封閉嘅，咁你就要考慮以下幾種交通方案。 1. 龍鼓灘（按我導航）龍鼓灘係最接近曾咀而又泊到車嘅地方，大家可以泊喺龍鼓灘鄉公所呢個停車場，價錢就大家去到先知喇，閒時就$10-$20左右，泊好車，入去鄉公所間士多比現金就得，因為我閒時去，佢連車牌都懶得抄，收完錢就繼續打麻雀。又或者前一個街口，有個龍鼓灣BBQ場都係有得泊車嘅。價錢又係去到先知啦。 泊完車之後，搭綠的去曾咀約$50，又或者你可以搭春秋二祭先有嘅九巴56S線或港鐵巴士K52A來回曾咀，收費係56S線的$11.9及K52A線的$9.6。車程約10分鐘。 2. V City / 屯門站停車場（按我導航）既然你揸車都入唔到曾咀，泊龍鼓灘都係要轉巴士同埋又要揸成10公里浪費油錢。咁不如泊V City或者屯門站停車場啦，反正56S及K52A總站就喺V City樓下。不過如果你打算搭的士的話，由V City往曾咀車資約$200。車程約35分鐘。 停車場價錢詳情請參閱泊好先。兩個停車場收費係一樣，兼同樣可以享用V City免費泊車優惠，詳情請按以下hashtag到商場專頁瀏覽。 註：2022年九巴宣佈不開設56S線。故此乘客必須選擇K52A前往曾咀。 #墳場 #泊邊好...

雖然嘉道埋農場已經開咗好多年，但係嘉道理農場至今依然係帶小朋友去認識動植物既好地方。 除咗動植物之外，呢度一花一草一擺設，只要你搵啱角度的話，就可以影到靚相。 去嘉道理農場泊車泊邊好？ 1. 嘉道理農場停車場（按我導航）呢度有７個免費車位比遊客使用，不過要預先上網預約。 2. 錦上路站停車場（按我導航）如果以距離同泊車價錢黎講，我就會介紹大家泊錦上路站停車場，再轉64K巴士過黎。巴士車程20分鐘。錦上路站停車場車位多，價錢平，仲有日泊。去完嘉道理農場，順手行埋錦上路跳蚤市場就啱啱好。 3. 太和商場停車場（按我導航）如果由市區入黎既朋友，可以泊喺太和商場停車場，轉乘64K巴士去嘉道理農場，巴士車程約16分鐘。記住係泊太和B停車場，因為B停車場近巴士站，加上車位較多。而乘搭64K巴士時，記得上下車都要拍八達通咭以獲得短途優惠。落車前，行番去車頭上車既位置拍同一部八達通機就可以。 #大埔 #泊邊好 #親子自駕遊 #遊樂自駕遊 其餘熱門泊邊好文章：東涌泊車泊邊好？D2 Place滿晒附近泊車泊邊好？港外線碼頭搭船去離島玩泊車泊邊好？全港Donki尋寶地圖海洋公園泊車泊邊好The Wave / 觀塘工業區 泊車泊邊好？