泊邊好標籤

標籤: 區區泊邊好

大圍泊車泊邊好

大圍(本文泛指大圍港鐵站附近既積福積輝街一帶)一向想泊車真係好艱難。一係就泊街或者搏嗰少量嘅錶位,如果唔係就要泊出名地獄嘅富嘉花園。所以今集區區泊邊好,我地就為大家介紹吓大圍仲有咩好停車場可以泊。而最特別嘅係,我地今集請咗喺YouTube發佈4K POV行車片好出名嘅HK Driver Mike黎同我地一齊挑戰富嘉地獄,當然唔少得大圍區嘅飲食情報介紹啦。有興趣嘅朋友可以睇以下既片段,齋想睇停車場嘅朋友請繼續睇落去。 https://www.youtube.com/watch?v=bw0De9MsO6w 海福花園停車場(按我導航)沿住港鐵站天橋行就可以黎到海福花園停車場。唯一缺點係時租只可以泊露天位,同埋過番大圍要經天橋,不過依家天橋都有電梯,應該唔算缺點啦?而最重要係咩呀?佢仲平過地獄場,咁唔駛諗啦。價錢詳情請參閱泊好先。 富嘉花園停車場(按我導航)人生難免會泊幾次地獄停車場既。咁富嘉花園點解被稱為地獄呢,首先上落通道窄,其次係車位勁窄,泊完都開唔到門,而最衰既係佢無電梯,你泊幾高就要行番幾多層樓梯。不過,如果你有睇上面條片的話,我地版油係咁衝都無問題,事實上無大家想象中咁窄,學阿Mike話齋,沙田區大把場窄過佢。至於車位窄,只要你泊高多幾層,同埋搵啲柱邊位泊,咁都OK開到門。佢係有啲位有水喉突出黎嗰排位窄啲,其餘啲位都算正常既。咁當然,最近大圍港鐵站,價錢一定係最貴架喇。價錢詳情請參閱泊好先。 #區區泊邊好 #沙田

石門泊車泊邊好

https://youtu.be/oktnbXSDVkU 自從京瑞廣場開幕之後,石門越黎越熱鬧,特別係抄牌,閒日又抄假期就更加抄得密。所以泊邊好為大家搵咗5個喺京瑞廣場附近嘅停車場畀大家參考,要平既有平,要易泊既有易泊,要充電嘅仲有中電中速叉電站介紹埋畀你。睇上面條片或者下面逐個停車場睇啦: 碩門邨停車場(按我導航)碩門邨係首選嘅停車場,因為佢時租平$17,又近京瑞廣場。行番出邨口過條馬路就到。唯一要記住時租入口係喺安耀街迴旋處嗰邊入,一條路行埋尾見到下面街景既閘就係。入面有室內有露天,室內有房署嘅慢速叉電位。價錢詳情請參閱泊好先。 安麗街大涌橋路(露天)停車場(按我導航)爛地場就一定平啦,$18一小時仲有日夜泊。不過佢最低消費係兩小時,另一個缺點係落雨時個爛地場會變泥地場,上車時成腳泥水上車,平係有少少代價架喇。價錢詳情請參閱泊好先。 新界鄉議局大樓停車場(按我導航)唔介意畀多少少錢,可以考慮泊上面爛地場斜對面嘅鄉議局大樓。時租$25,話晒都室內場,仲有中電中速充電位。價錢詳情請參閱泊好先。 沙田萬怡酒店停車場(按我導航)如果鄉議局大樓無晒位的話,轉個彎泊沙田萬怡酒店啦。同樣係$25一小時,酒店式管理,抵泊喇掛?價錢詳情請參閱泊好先。 滙貿中心停車場(按我導航)最後介紹埋呢個場比大家,唔好覺得$30一個鐘好貴,京瑞廣場係$35呀。呢個場嘅好處係逢星期六日同假期佢嘅時租位就係地下嗰幾個貨車位,真係打橫打直任你泊都唔會撞,唔介意比錢又唔識泊車嘅新手,泊呢度行過斜對面就係京瑞,所以都係一個唔錯嘅選擇。價錢詳情請參閱泊好先。 #泊邊好文章 #搵食自駕遊 #親子自駕遊 #遊樂自駕遊 #沙田 其餘熱門泊邊好文章:東涌泊車泊邊好?D2 Place滿晒附近泊車泊邊好?港外線碼頭搭船去離島玩泊車泊邊好?全港Donki尋寶地圖海洋公園泊車泊邊好The Wave / 觀塘工業區 泊車泊邊好?

油麻地泊車泊邊好

https://www.youtube.com/watch?v=e1bezfBnBQ4 自從油麻地多層停車場拆卸之後,想喺油麻地泊車就真係難。有見及此,今集區區泊邊好會介紹4個喺油麻地多層停車場附近既停車場畀大家參考,希望幫到大家。咁當然會順路介紹埋該去既景點啦。最後仲會同大家破地獄,揸部BMW 330i出入德興街嘅伊利停車場,仲有秘技教大家點樣可以安全逃出四樓,有興趣嘅朋友可以先睇片,想直接睇停車場資訊嘅請參閱下面: 駿發花園停車場(按我導航)位置黎講最近油麻地多層停車場嘅正規停車場,亦係去菓欄買生果嘅首選,不過由於選擇少,所以都幾FULL吓。價錢$25 / $28,仲有日泊,價錢詳情請參閱泊好先。 鴉打街露天停車場(按我導航)位置一定係靚,近廟街煲仔飯,喺正廟街牛雜旁邊。只係爛地場你敢唔敢泊,時租$30仲有夜泊。價錢詳情請參閱泊好先。 德興街238號停車場(按我導航)如果你想去近佐敦呢邊,又唔想去到童軍中心咁遠的話,無可避免要黎德興街。不過原來德興街除咗出名地獄嘅伊利停車場之外,畀多十蚊,有呢個正正常常嘅德興街238號停車場,外表好似好舊咁你經過都唔敢泊入去,但係裏面原來好光猛,仲有自動門同升降機上番地面,時租$30。價錢詳情請參閱泊好先。 伊利停車場(按我導航)馳名地獄場,出入通道勁窄,未去過嘅朋友請睇咗上面條片先好決定去唔去,不過出奇地車位原來勁闊,加上地獄嘅關係,時租特平,$20 / $26 仲有日泊,都係嗰句,睇咗片你有信心先好去。價錢詳情請參閱泊好先。 #泊邊好文章 #搵食自駕遊 #親子自駕遊 #遊樂自駕遊 #旺角 其餘熱門泊邊好文章:東涌泊車泊邊好?D2 Place滿晒附近泊車泊邊好?港外線碼頭搭船去離島玩泊車泊邊好?全港Donki尋寶地圖海洋公園泊車泊邊好The Wave / 觀塘工業區 泊車泊邊好?

西貢泊車泊邊好

泊邊好YouTube Channel全新節目,區區泊邊好。第一集會帶大家去西貢,介紹西貢區最易泊最平同最近嘅停車場比大家,當然仲會有西貢區嘅特式小店同餐廳介紹。 https://www.youtube.com/watch?v=qutJq8tGwcg CENTRO MALL 城市娛樂中心停車場(按我導航)優點係車位勁闊,新牌仔都唔駛驚。估你唔到嘅係西貢原來都有免費泊車優惠,黎行街食吓野就走嘅朋友可以考慮吓。特別係人手洗車免費泊車優惠,扣番停車場錢即係幾十蚊洗車咋。價錢詳情請參閱泊好先。 fusion超市免費泊車優惠消費滿$200免費泊車一小時消費滿$200免費泊車兩小時人手洗車免費泊車優惠細車$140大車$170凡惠顧人手洗車可享兩小時免費泊車優惠 西貢政府合署停車場(按我導航)無乜優點,係近碼頭海鮮檔,注意開放時間係閒日夜晚七點後,星期六日就全日開放。價錢詳情請參閱泊好先。 西貢苑停車場(按我導航)位置最近西貢市中心,所以價錢當然貴,車位偏窄,但係車位極多,星期六日都唔怕無位,錢果然係萬能。想平或者要日泊嘅朋友請繼續睇埋下面嘅爛地場。價錢詳情請參閱泊好先。 美裕街露天停車場(按我導航)西貢呢度有兩個爛地場,其實兩者相距唔夠1分鐘步程,但係揸車就要分兩個入口兩條唔同既街先入到。有睇上面條YouTube片嘅朋友都會知道泊邊好並不介紹大家泊呢個場,因為星期六日好快就滿仲要留匙,想泊爛地就睇埋下面嗰個。價錢詳情請參閱泊好先。 美福街露天停車場(按我導航)講咗咁耐,全西貢最平最抵泊應該係呢個場,時租都只係$12 / $25,仲有日泊$85 / $160,車位多又唔駛留匙。雖然停車場入口比較遠,但係佢有個行人出口喺美裕街露天停車場旁邊出,所以兩者相差不足1分鐘步程,呢個場絕對泊得過。價錢詳情請參閱泊好先。 滘西洲多層停車場(按我導航)講真,呢個場真係算平又算近。可惜係經常無位同埋計法都幾複雜吓。簡單交代番,唔好泊樓下,淨係泊樓上就最穩陣,因為泊樓下某啲時段會有附加費。價錢詳情請參閱泊好先。 #泊邊好文章 #搵食自駕遊 #親子自駕遊 #遊樂自駕遊 #將軍澳 其餘熱門泊邊好文章:東涌泊車泊邊好?D2 Place滿晒附近泊車泊邊好?港外線碼頭搭船去離島玩泊車泊邊好?全港Donki尋寶地圖海洋公園泊車泊邊好The Wave / 觀塘工業區 泊車泊邊好?

東涌泊車泊邊好?

個個都問去東涌泊邊好?咁泊邊好網站當然要幫吓大家手啦! 首先教吓各位新車主一個有邨泊邨既道理。一般屋邨既停車場都必定有時租,車位多又唔會貴得去邊,領展旗下既屋邨場大部份都有12/24小時泊添。以下落黎你就會睇到,我地由最近東涌市中心既停車場講起: 1. 東薈城去得東涌,都應該會行東薈城或者喺東涌巴士總站轉車去大嶼山其他地方,所以東薈城係首選,再加上佢本身收費平。南面停車場$16,北面停車場$14。所以依傢逢六日假期必定爆滿。價錢詳情請參閱泊好先。 東薈城南面停車場(按我導航) 東薈城北面停車場(按我導航) 2. 東涌文東路體育館停車場(按我導航)首先,唔好奇怪點解有個近啲既富東商場停車場我唔講,咁快黎咗呢個。因為富東商場停車場長期無位,講都無用。講番東涌文東路體育館停車場,體育館之中佢都算幾貴,首兩小時既價錢係每半小時$9 / $12,請參閱泊好先。不過如果你只係想去東薈城行一陣街,而東薈城又無位的話,近近地呢個場泊得過既。 3. 映灣薈停車場(按我導航)時租價錢$18一個鐘,唔算太平。但係逢星期五六日及公眾假期有24小時泊優惠,只需$100。仲平過泊逸東邨,不過逸東邨有12小時泊,所以無必要用24小時泊黎比較。價錢詳情請參閱泊好先。 4. 逸東商場停車場(按我導航)一開始教咗大家有邨泊邨,咁耐以黎泊逸東邨都係我首選。因為佢有12/24小時泊,以前去機場做野定去旅行,泊逸東轉的士/巴士都係唔錯既選擇。價錢請參閱泊好先。 明知依家東涌咁爆,介紹多兩個冷門選擇比大家。就係兩條房委會既新屋邨滿東邨同迎東邨,只有時租不設日泊,收費同樣係$13一小時。 我知,總有人教你泊喜東街爛地場,$10一個鐘嘛。但係你睇吓佢喺油站旁邊,行又遠搭車又唔夠邨方便(邨係總站到東涌巴士總站,班次又密)。如果你考慮呢個,不如睇埋下面個終極大佬先。 終極大佬,欣澳露天停車場(按我導航)欣澳露天停車場真係無敵。大家好好記住佢,價錢平仲有日泊兼唔會無位。無論去迪士尼定愉景灣我都推薦大家泊欣澳露天停車場。價錢請參閱泊好先。 如果大家有邊區既泊車資訊想我地介紹的話,歡迎去泊邊好facebook Page留言架。 #東涌 #泊邊好 #親子自駕遊 #遊樂自駕遊 其餘熱門泊邊好文章:大嶼山自駕遊泊車泊邊好?D2 Place滿晒附近泊車泊邊好?港外線碼頭搭船去離島玩泊車泊邊好?全港Donki尋寶地圖海洋公園泊車泊邊好The Wave / 觀塘工業區 泊車泊邊好?

大嶼山自駕遊泊車泊邊好?

如何申請大嶼山自駕遊許可證?想玩大嶼山自駕遊,仲難過搶平價機票。首先,你要一早七點正登入以下網站搶許可證。每日只會派發25張證,當中仲有5張係電動車專用,即係汔油車得番20張證咋。至於日期方面,由於日日都爆晒既關係,所以每日只可以搶到下個月同一日既許可證(即係9月10日朝早登入, 就可以搶到10月10日既許何證)。許可證收費為HK$75。記得要準備定信用咭比錢。 申請大嶼山封閉道路通行許可證(https://www.gov.hk/tc/residents/transport/roadandtraffic/lantaupermit.htm)提提大家幾樣野:1) 一定要係私家車,輕型貨車並不可申請2) 你一入車牌既時候,佢就知你係電動車定汔油車,呃唔到的3) 許可證只限平日使用,所以如果你明知下個月同一日係星期六、日或者紅假既話,就可以放棄,摘日重賽 當你成功搶到許可證之後,政府會郵寄張證比你。好方便,唔駛去拎。同時會提醒你上網睇大嶼山自駕遊小冊子。唔明嘅話,可以睇以下片段。 https://www.youtube.com/watch?v=ux0T1Jf8P30 收到張證之後,準備出發,我哋仲為大家準備咗精彩嘅大嶼山自駕遊片段,入面仲有大澳泊車好介紹添。文字版請繼續收睇以下。 https://www.youtube.com/watch?v=IR_qgeiQS00 https://www.youtube.com/watch?v=17rWk5VynQg 上長沙 上長沙呢度真係好神奇,明明係個沙灘,但係因為大浪既關係,啲海水浸到上救生亭度。呢張相已經潮退既時候影,如果潮脹既話,連樓梯都見唔到,你話係咪千奇百趣?(按我導航至上長沙) 而去得上長沙,一般都會去埋下長沙既。下長沙係一個好長既沙灘,仲有幾間餐廳食肆。大家平時睇相見到人地望住個沙灘食野既就係下長沙喇。(按我導航至下長沙) 石壁水塘 跟住大家一定要黎呢度影張相,無論點影都咁靚,呢度就係石壁水塘。呢度附近無錶位,要泊就學我咁揸入去水塘邊個平台仔啦。影完相就出發上大佛。(按我導航至石壁水塘) 天壇大佛 天壇大佛呢度既車位就係喺巴士總站旁邊,放心啦,成個大嶼山有路牌既地方,都加設晒 "P" 字既停車場指示牌,好清楚的。呢度大把位,無人同你爭,唔駛驚無位,唯一特別既係,全個大嶼山,得呢度係要比錢入錶。就連大澳同埋梅窩都係免費泊車的。(按我導航至天壇大佛) 而去得大佛,除咗食齋之外,當然唔少得去心經簡林吸收吓靈氣。 (TVB劇集踩過界2就係喺呢度拍架) 跟住落黎,當然會順路去埋大澳,大澳個停車場係喺平時大家上落巴士個巴士總站附近,去到你就見到架喇。呢度車位都尚算充足,不過如果真係唔好彩無位既話,你可以泊入去屋村入面,村入面都有個停車場。 大澳 左手邊係大停車場入口,右手邊係大澳巴士總站。呢度係免位泊車位無需入錶,亦都無安裝咪錶。(按我導航至大澳) 呢間茶果鋪係無招牌既,佢無開門既日子你完全唔知佢係賣茶果。呢間啲茶果超好食,有花生同眉豆味比你揀。佢不定時開,賣晒就收鋪。 大澳啲貓好黐人,隨街都有貓同你玩 你估你跳到二樓咁高我就影你唔到? 貝澳 如果你覺得你手車唔錯,而又勇於探險既,大嶼山好多唔似行車路既路可以比你去發掘。例如下面呢條車CAM片,帶你去貝澳天后廟。唔係揸住部Smart我都唔敢入去,越行越窄,好似唔行得車咁。(按我導航至貝澳泳灘停車場) https://www.youtube.com/watch?v=6MJJgEYcMOs&feature=emb_title 梅窩 最後,當然要去埋梅窩。雖然梅窩大家都去慣去熟唔駛我多介紹,不過全個大嶼山自駕遊,最難搵位既就係梅窩。你一去到,本身村民既車已經泊晒上行人路,可想而知你想搵個位係有幾難。一般黎講,我會介紹大家去梅窩碼頭旁邊泊收費既爛地停車場,好平,只需$8一個鐘。 如果你唔介意行既,可以再去遠少少教堂旁邊有個大型咪錶場。不過我試過,未必有位。 呢個係無人店。你泊完車之後行過黎自己按制取票 (見下圖)。攞車走既時候,就好似自助超市咁掃一掃八達通機旁邊部掃瞄器,然後拍八達通比錢就得。(按我導航至梅窩爛地停車場) 梅窩瀑布 如果你放大張相黎睇,條柱係寫住 "咖啡、奶茶",呢度以前係士多黎架。 要去梅窩瀑布有兩個行法,比較舒服既行法就係由梅窩街市嗰邊,沿白銀鄉方向行,呢度沿路都係平路。踩單車去都無問題。由梅窩街市停車場出發去到梅窩瀑布,步行約20分鐘,踩單車約10分鐘。 過咗白銀鄉少少就會見到呢間文武廟。再行前多少少就會去到上幾張相既奧運徑,沿指示牌行就會到梅窩瀑布。 唔知叫好彩定唔好彩,由於呢幾日都好好天無落雨,所以你係可以行入去個瀑布底好似我咁周圍影相。佢真係有樓梯比你行出去,唔係我夾硬黎架。不過當你行到出去時當然要小心啲。而唔好彩既係,由於太好天,所以好似無乜水比你感受到瀑布既威力。所以我補番張官方相你睇啦。睇完瀑布唔好走住,再向山上面行多幾分鐘,就會到梅窩銀鑛洞。 個洞行到最入都係咁啫, 我專登打光咗比大家睇吓入面係點樣既. 後記:1) 由於限額既關係,全條路都唔多車,直情可以用無車黎形容;2) 全程自駕遊,以羌山道最難行。原因係東涌道夠闊又直,起碼部車可以上三波慢慢行。但係羌山道全部都係盲眼彎,條路又勁斜,對面線又有巴士;3) 全程自駕遊,大部份路段都係行50。至於大家最擔心既測速相機位得一個,仲要係限速30公里既路段!梅窩出黎東涌/大澳的話,見到30呢個路牌開始要小心,雀籠喺一條大落斜最底近貝澳老圍村。個雀籠比啲樹遮住晒,好隱閉的!而由東涌/大澳去梅窩的話,調番轉貝澳上斜,上到頂平地既時候,左手邊就會見到大大個橙色雀籠,呢個明顯好多,加上呢段係影50。

其他受歡迎的資訊