泊邊好標籤

標籤: donki

屯門DONKI驚安之殿堂泊車泊邊好?

大家喺各大Facebook Page都見到屯門Donki已於7月20日開幕,仲要係全港最大嘅Donki添喎,呢間仲有屋台區、情熱價格區同埋日本物產區添。 講番地址先:屯門市廣場1期UG/F 001-023號鋪營業時間:上午8時至凌晨1時 屯門市廣場 (即係人稱屯門市中心) 既好處係佢本身已經有3個停車場,再加埋佢周圍嘅相連商場同屋苑數埋都有9個停車場咁滯,不過假日依然係大排長龍。所以今日就介紹幾個附近嘅停車場比區外朋友參考。屯門牛可以無視呢篇文章,你懂的。 1. 屯門市廣場 (按我導航至3期停車場)屯門市廣場雖然有3個停車場,不過一般都係用1期同3期兩個,2期就忘記佢啦。但係無論閒日定假日都好滿吓。另外要提提大家既係,呢個場係出晒名攞泊車優惠麻Q煩嘅。星期六日及公眾假期如果你想攞免費泊車優惠的話,你一定要泊3期停車場先有。但係你睇吓下面張地圖,3期其實係另外一座建築物黎,泊完車要行番去屯門市廣場的,當然,可能商場知道自己多人泊車想做分流掛。 另外屯門市廣場於7月20日至9月30日推出一個屯門市廣場 x DON DON DONKI 愈夜愈想買 免費泊車優惠,想夜晚10點後先去Donki嘅朋友可以睇睇。 詳細價錢請參閱泊好先。 2. 屯門栢麗廣場停車場 (按我導航)屯門柏麗廣場係一個多層停車場,所以優點係價錢平車位特多,缺點當然係相對嘅要兜好多層先有位。不過我好推薦大家泊呢個,因為多數有位之餘佢又唔係話行好遠,佢喺正屯門大會堂旁邊,由平台行番去屯門市廣場都係5分鐘內嘅事。時租$16/22,算好合理架喇,詳細價錢請參閱泊好先。 3. 屯門政府合署停車場 (按我導航)一提到政府合署停車場,大家就知道一定平到笑。無錯,閒日夜晚7點後時租只需$5,仲平過入錶。佢位於上面介紹既栢麗廣場停車場前少少,所以你可以睇咗呢個有冇位先,冇先去柏麗都未遲,詳細價錢請參閱泊好先。 4. 新都大廈停車場 (按我導航)拿‧我都講咗屯門牛可以無視呢篇文章架啦。我知你實話有幾個近好多嘅停車場例如華都花園停車場、屯門時代廣場停車場同埋錦薈坊停車場做乜唔介紹丫嘛?呢幾個場長期無位,介紹區外人黎只會齊齊塞死屯隆街屯順街。所以區外人黎得行街,都唔介紹泊遠少少咁多,順手參觀埋華道大道同埋英皇戲院架?所以最近而又最有可能有位嘅最後一個選擇就係新都大廈喇(即係英皇戲院所在嘅商場)。詳細價錢請參閱泊好先。 5. 屯門仁政街露天停車場 (按我導航)其實我覺得上面介紹嘅栢麗廣場停車場已經算無敵,咁多層咁多位都好少真係FULL到排唔到隊嘅。不過有人問屯門有冇爛地場喎?咁就等我哋介紹埋呢個終極嘅爛地場俾大家。佢係喺城‧點嘅後面嘅天橋底。泊呢度行入屯門市廣場唔駛30秒,穿天橋底行入去就係,所以都好近。不過個停車場入口就隱蔽左少少,區外人未必熟呢頭。詳細價錢請參閱泊好先。

全港Donki尋寶地圖

想問去Donki泊邊好?唔駛再周圍問畀人笑話係月經post喇!我地為你整合左全港Donki尋寶地圖,邊日想去Donki,只需要記住我地呢個網址https://parkbin.hk/donki,全港Donki地址show晒畀你睇,只要click上面Donki icon,就會介紹埋畀你睇附近泊邊好!立即出發! Donki銅鑼灣 名珠城店香港銅鑼灣百德新街22-36號名珠城1至4樓2617-701124小時營業* 因應新型冠狀病毒疫情,營業時間更改為早上6時至凌晨4時,直至另行通知。銅鑼灣Donki驚安之殿堂泊車泊邊好? Donki荃灣 海之戀本店荃灣大河道100號海之戀商場2樓2001號舖2652-2611上午9時至凌晨1時荃灣海之戀Donki驚安之殿堂泊車泊邊好? DON DON DONKI Monterey Place 店將軍澳唐俊街23號 Monterey Place 1樓107-113, 115-122號舖2652-261124小時營業將軍澳Donki驚安之殿堂泊車泊邊好? Donki中環 100QRC店中環皇后大道中100號LG及地庫2261-061124小時營業中環Donki驚安之殿堂泊車泊邊好? Donki尖沙咀 美麗華店九龍尖沙咀美麗華廣場2期地庫B161, 163 & B165-173號舗2650-041124小時營業* 因應新型冠狀病毒疫情,營業時間更改為早上7時至凌晨5時,直至另行通知。尖沙咀Donki驚安之殿堂泊車泊邊好 Donki藍灣半島 DON DON DONKI 藍灣廣場店小西灣小西灣道28號藍灣廣場1樓102及108號舖2869-6411上午9時至凌晨1時藍灣廣場DONKI驚安之殿堂泊車泊邊好? 情熱笑店...

藍灣廣場DONKI驚安之殿堂泊車泊邊好?

位於小西灣藍灣廣場 1 樓嘅DON DON DONKI 藍灣廣場店會喺2月4日(四) 早上10點隆重開幕,以往績黎講,藍灣廣場個停車場會大排長龍,仲可能會提高免費泊車優惠個門檻添。想知道除咗泊藍灣廣場之外泊邊好?留意以下內容喇! 泊邊好? 1. 藍灣廣場(按我導航)首先介紹咗藍灣廣場先,因為佢平時時租都算平,閒日$17星期六日假期$20。(以泊好先為準)加上佢暫時個泊車優惠勁易攞。買$100免1個鐘,買$200免2個鐘。(詳情可留意泊邊好藍灣廣場專頁)。 2. 小西灣運動場(按我導航)小西灣運動場好處係夠近,泊完車行過去藍灣廣場都唔駛5分鐘。缺點係方向唔夾,如果你去到藍灣廣場後發覺無位想轉場,去下一個介紹既小西灣邨係順路過去小西灣運動場既。時租以半小計,每半小時$4(詳請請參閱泊好先) 3. 小西灣廣場/小西灣邨(按我導航)小西灣廣場有分一期同三期停車場,一期係商場嗰個,比較多位;三期要喺富景花園嗰邊入。兩期時租價錢一樣$21 / $23,同樣有領展既泊車優惠。不過一期仲多個12小時泊添。(時租詳情請參閱泊好先)

荃灣海之戀Donki驚安之殿堂泊車泊邊好?

我知道你心入面一定會話,去海之戀 Donki 泊入去海之戀咪得囉。但係你又有冇試過排隊排到去迴旋處甚至上番天橋?再加上海之戀個泊車優惠等於無優惠(見泊邊好OP Mall專頁)。所以總係好多人問泊邊好?今集就等泊邊好介紹既個又平又近既場比大家啦!由於價錢唔係相差太遠,我地由最近海之戀講起。 1. 海之戀商場 OP Mall(按我導航)除咗有時會排長龍之外,都無乜理由唔直入海之戀商場泊車架喇。時租唔係貴人好多$20 / $23(請參閱泊好先),不過佢個泊車優惠等於無優惠。佢一日未比錢落廣告我都係咁講架喇。所以好多人專登唔幫襯佢。 2. 荃灣西站停車場(按我導航)荃灣西站既入口同海之戀商場係一樣,只係荃灣西站停車場喺地庫,而海之戀商場係轉右上二樓。荃灣西站泊車之後,一樣有電梯直達商場各層。所以同泊海之戀商場係一樣咁方便。時租方面,正常價錢係$19 / $24(請參閱泊好先),但係如果你識利用泊車轉乘優惠既話,就可以變成$12 / $15。 (原站出入嘅泊車轉乘優惠已經玩爛咗)玩法好簡單,當你泊車之後,去荃灣西站入閘,於一分鐘後出閘,就會扣你最低消費$3.8。(記得要等一分鐘先出到閘架,扮搭車要扮全套)。之後你就可以安心去Donki行街,到你攞車後直接拍八達通出閘,就可以享有$12 / $15一小時優惠喇。咩話?你想連$3.8都慳?好啦,行兩步平多兩蚊好無?咁你泊車後唔好去荃灣西站入閘住,先去荃新天地UG/F,近UG56鋪對出既港鐵優惠站,拍一拍八達通減$2,之後安心去行街食飯,攞車前先至去荃灣西站玩入閘出閘。就可以減多$2,淨係比$1.8港鐵賺。 3. 大河道停車場(按我導航)其實喺如心廣場2期同海之戀商場中間既小巴站旁。時租係$16 / $19(請參閱泊好先)。近期減咗價迎戰荃灣西站泊車轉乘優惠,不過如果泊呢邊我寧願泊如心廣場2期好過,仲可以搏買野攞泊車優惠。 4. 如心廣場2期(按我導航)自從開咗如心廣場2期就好喇,唔駛再去荃灣廣場排長龍。而如心廣場2期既免費泊車優惠又易攞(請參閱泊邊好如心廣場專頁)。時租$18 / $22(請參閱泊好先)。 其餘荃灣廣場同荃新天地1,2期我就唔介紹住喇,呢啲老牌商場大家泊慣泊熟。同埋正常黎計以上呢幾個場都總會有位比你泊。夠用架喇。 #荃灣...

將軍澳Donki驚安之殿堂泊車泊邊好?

將軍澳Donki係除咗中環之外,另一間仲係24小時營業既店鋪,所以由朝到晚都咁旺。小編今日教大家去將軍澳Donki泊車泊邊好: 1. Monterey Place 澳南海岸停車場最好當然係泊番去澳南海岸停車場啦,因為可以攞免費泊車嘛。雖然因為Donki既開業令到個泊車優惠縮晒水,星期六日要消費滿$400先免得一個鐘,但係喺Donki好易買幾百蚊野既。時租價錢請參泊好先。(按我導航) 2. Papillons Square 翩匯坊停車場喺正澳南海岸旁邊,有全新界最大既冒險樂園,佔地14萬平方呎架。雖然無乜其他野好行,勝在近同平$2一個鐘。時租價錢請參泊好先。(按我導航) 3. Ocean PopWalk 海天晉匯再比多一個SPARE你。呢個比較特別,因為係免費泊車!免費!係免費!7月1日新開嘅Ocean PopWalk停車場有免費泊車優惠,你只需要買任何野,一包紙巾甚至一份報紙都得,就可以有一小時免費泊車,之後每個鐘都只不過係$15。係除外Park Central外另一個可以玩免費泊車玩到出神入化既場,缺點係時租車位比較少。時租價錢請參泊好先。(按我導航) 4. 藍塘傲(Alto Residences) / 格林威治村(Greenwich Village)停車場如果上面兩個停車場都無位既話,沿住海邊行5分鐘過黎格林威治村啦。應該係全將軍澳最平$11一個鐘,仲有日泊優惠。帶埋小朋友黎行Donki再踩單車就啱晒,再者,格林威治村有多間半露天餐廳,當中一間係寵物有善餐廳Stay With Cafe,泊邊好都有介紹過架。時租價錢請參泊好先。(按我導航) DON DON DONKI Monterey Place 店地址:將軍澳唐俊街23號...

尖沙咀Donki驚安之殿堂泊車泊邊好

尖沙咀同銅鑼灣泊車一向麻煩,泊mira place佢個泊車優惠又要指定店鋪(Donki不在指定店鋪之列);泊The One,貴得黎仲要無位,咁去尖沙咀 Donki 泊邊好?一齊黎睇啦! 1. 中間道停車場 H Zentre雖然遠少少,但係H Zentre做緊泊兩小時或以上,無條件免費一小時優惠,無需登記,無需消費,直接拍八達通出閘就會減番,係近期去尖沙咀既不二之選?(按我導航) 2. 童軍中心去佐敦或者尖沙咀近佐敦嗰邊,泊童軍中心一定無錯,價錢平仲有24小時泊。價錢請參閱泊好先。(按我導航) 3. 中港城唔好以為中港城好遠,其實只要你識穿行人天橋去九龍公園,幾分鐘就到Donki。時租價錢貴海港城港威大廈一元,但有日泊優惠,星期六日日泊只需$80,價錢請參閱泊好先。(按我導航)

銅鑼灣Donki驚安之殿堂泊車泊邊好?

座落於銅鑼灣珠城廣場既Donki 驚安之殿堂 樓高4層,相信唔係一兩個鐘就可以行得完。珠城廣場附近停車場時租都超貴,平日由$36-$50不等。雖然都有啲免泊優惠,但都屬於高消費行列,夾硬買野享免泊有難度。 Fashion Walk停車場 時租$36, 詳情請參閱 Parkhaus.hk/FashionWalk柏寧酒店停車場 時租$35 / $42,詳情請參閱 Parkhaus.hk/parklane皇室堡停車場 時租$42 / $50,詳情請參閱 Parkhaus.hk/windsor 想要泊得平啲,就唯有行遠兩步路,但原來都只係行7-10分鐘,又唔算太遠喎。 1. 禮頓中心停車場(按我導航)設有時租$14半小時及$98泊4小時優惠,價錢請參閱泊好先 Parkhaus.hk/Leighton 平日消費$100可享免泊5小時;銅鑼灣區最平停車場;8分鐘步行距離;唯旋轉車道上停車樓層較窄,需要技術。(商場泊車優惠請參閱泊邊好LEE GARDENS專頁) 2. 利園三期停車場(按我導航)時租$17/$18半小時,價錢請參閱泊好先 Parkhaus.hk/LeeGardensIII 平日消費$300可享免泊5小時;7分鐘步行距離;停車場闊落,容易泊車(商場泊車優惠請參閱泊邊好LEE...

中環Donki驚安之殿堂泊車泊邊好?

中環泊車貴就係人都知,咁如果你想去中環DON DON Donki的話泊邊度最平呢?今次等我地帶你由最平到最近咁介紹你聽! 1. 香港站停車場(按我導航)要平就遠少少架喇,不過其實你可以穿IFC到恒生銀行同舊中環街市條天橋直達100QRC,雨都唔駛淋其實係唔錯。時租原本係$37一小時(請參閱泊好先)。但係如果你識玩泊車轉乘的話,只需$19一小時咋!!玩法好簡單,當你泊車之後,安心去Donki行街,返黎時先於中環站拍八達通入閘扮搭車,然後於香港站出閘,港鐵會收你大約$4車資。然後你就可以直接攞車拍八達通出車,無需做任何登記。就可以享有$19一小時優惠喇。咩話?你想連$3.8都慳?好啦,行兩步平多兩蚊好無?當你去Donki前或後,去近大館對出半山自動扶手梯行人天橋既港鐵優惠站,拍一拍八達通減$2,之後安心去行街食飯,攞車前先至去香港站玩入閘出閘。就可以減多$2,淨係比大約$2港鐵賺。 2. IFC2期(按我導航)唔想咁麻煩又唔想咁貴,咁就直接泊入IFC啦,時租$28(請參閱泊好先)。同上文講既一樣,穿過天橋直達100QRC。 3. 中環中心(按我導航)如果講最近既停車場,一定係中環中心或者萬宜大廈,中環中心時租$38;萬宜大廈每半小時$20。表面上萬宜大廈貴啲,但係佢可以用半個鐘計無咁傷。中環中心就多位啲,星期六日好闊落。如果你打算速戰速決,買啲野就上車的話,直接入中環中心唔好諗。 4. 萬宜大廈(按我導航) 中環Donki驚安之殿堂地址:香港中環皇后大道中100號LG及地庫 未咁快完,去得中環你應該會去埋大館或者PMQ之類掛?所以你可以睇埋泊邊好為你推介既:大館泊車泊邊好?同埋 PMQ泊車泊邊好? #全港Donki泊邊好 #其他泊邊好文章 #中上環

其他受歡迎的資訊