本文主要介紹閒日返工朋友既時租同日泊需要，及假日市民前往megabox既後備停車場選擇。如需了解E-Max九龍灣國際展貿中心泊邊好的話，請按此。
如需了解郵輪碼頭泊車泊邊好的話，請按此。
如需了解兒童醫院泊車泊邊好的話，請按此。
megabox至常悅道之間
| 一至五 時租 | 六日 時租 | 一至五 日泊 | |
| megabox | $21 | $24 | NIL |
| 一號九龍 | $18 | $16 | NIL |
| 國際交易中心 | $21 | $21 | $158 （至17:59） |
| 富臨中心 | $23 | $23 | $140 （至23:59） |
| 業安工業大廈 | — | — | — |
| 其士商業中心 | $22 | $22 | NIL |
| 明輝停車場 | $20 | $20 | $80 (07:30-18:30) |
如果你係去megabox至常悅道之間返工見客等等。要朝早9點前先可能會有車位。否則只可以揀megabox或者其士商業中心。11點打後一號九龍及國際交易中心會有少量吉位出現，要睇彩數。而富通中心因為佢係全東九龍最大Tesla V3超充站，所以長期爆滿，我自己返工都無位呀。我自己有時會搏吓業安工業大廈時租，偶有吉位。室內場仲要平過附近既商廈。（註：2022年9月起，業安工業大廈取消時租，應該等拆）
至於日泊既朋友，泊邊好搵到個隱世停車場比你，就係明輝停車場 (即是三湘九龍灣貨運中心)，不過缺點係泊天台露天同要留匙。記得地下最前嗰個更亭比咗錢講日泊先好上天台，上到天台有人會招呼你。
唔想留匙或者想泊室內既朋友可以考慮富臨中心，唔算太遠，日泊仲要去到夜晚12點，OT埋都唔驚。
假日想去megabox又唔想排停車場的話，可以泊企業廣場3期，同樣可以享有megabox免費泊車優惠，不過企業廣場3期既時租係露天兼唔太多位。想必然有位既可以考慮一號九龍或國際交易中心。
常悅道至美羅中心之間
| 一至五 時租 | 六日 時租 | 一至五 日泊 | |
| Centre Parc | $24 | $24 | $160 (至17:59) |
| The Eastmark | $22 | $20 | $160 (至18:59） |
| 九龍灣運動場 | $8 | $12 | NIL |
| 創豪坊 | $22 | $22（六） $14（日） | $150 (至17:59) |
| 高銀金融國際中心 | $20 | $20 | $145 （至23:59） |
| 九展 E-Max | $20 | $20 | NIL |
常悅道至美羅中心之間，停車場就好多，但係全部長期都FULL，特別係九巴廠附近。好彩有個長期有位既創豪坊可以幫吓手，至於美羅就麻煩啲，附近長滿，加上美羅同開達都貴都痴線。所以如果唔介意搭車Lift同留匙的話，可以泊The Eastmark（即大渣哥個場），否則過條隧道泊九龍灣運動場好過，$8一個鐘我諗大家都唔會有異議。不過The Eastmark個日泊算係咁，起碼可以泊到晚上7點。九龍灣好多場都只係去到6點，收6點既朋友完全用唔著。
至於億京中心至消防局之間，有位既選擇只有九龍灣國際展貿中心以及高銀金融國際中心。
註：相片取材自Wpcpey@Wiki
