今集內容集中講佐敦道廟街一帶嘅泊車介紹。如果你想知油麻地多層停車場嗰邊嘅泊車介紹,請參閱油麻地泊車泊邊好。
時租 | 日泊 | |
佐敦本木(Arbour) | $22 (一至四) $26 (五至日) | $140 (08:00-17:59) $70 (20:00-07:59) |
寶來大廈停車場 (德興街伊利地獄) | $21 (18:00前) $27 (18:00後) $21 (星期日全日) | $130 (08:00-17:59) 要先向職員講明日泊 |
彌敦道238號停車場 | $30 | N/A |
寶輝閣 | $29 (一至四及日) $36 (五及六) | $140 (08:00-18:59) 日泊只限星期一至五 $80 (21:00-07:59) |
渡華路威信露天 | $14 | $90 (08:00-17:59) $90 (18:00-07:59 |
童軍中心停車場 | $29 (11:00-19:59) $27 (其餘時間) $27 (星期日全日) | $150 (24泊) |
1. 佐敦本木Arbour(按我導航)
四星地獄場!!
以後去恒豐中心一帶,唔駛再考慮伊利地獄,喺德成街呢度開咗個新場。不過泊邊好都評佢為四星地獄,原因係要入車Lift,部Lift仲有夠窄,得2.1米闊同2.4米高,未達到五星地獄嘅原因係佢頭入頭出,已經容易過新興大廈要用尾入頭出。出入車直接泊八達通就可以開Lift同比錢。如果自問唔敢收鏡行直線嘅話請直接跳去下面彌敦道238號停車場。
2. 寶來大廈停車場 (德興街伊利地獄)(按我導航)
馳名五星地獄場!!
好多人都話,寧願抄牌都唔會入伊利地獄。拿,講明先,我真係成日泊嘅,我覺得無問題,車位仲好闊,係上落通道嚇人啲。不過因為拍攝嘅原故去過香港唔同嘅地獄場,我反而覺得呢個容易。至少佢係明買明賣,唔會陰濕。時租黎講,全佐敦最平係佢,特別係星期日。泊唔泊就閣下考慮吓喇,不過第一次入地獄前請先睇片,特別係出場,唔係咁易全身而退架。《泊邊好YouTube Channel》
3. 彌敦道238號停車場(按我導航)
去佐敦十個有九個都教你泊童軍中心,如果你想去近恒豐呢邊,無可避免要黎德興街。不過原來德興街除咗出名地獄嘅伊利停車場之外,畀多十蚊,有呢個正正常常嘅彌敦道238號停車場,外表好似好舊咁你經過都唔敢泊入去,但係裏面原來好光猛,仲有自動門同升降機上番地面,時租$30。只收現金!而最頂癊係佢有套票優惠,$1450就可以一年內泊60個鐘,除番開就等於$24左右一個鐘,經常去嘅朋友可以考慮吓。
3. 寶輝閣 (按我導航)
五星地獄!!
又係嗰句,如果你唔想行去童軍中心咁遠,想搵個最近廟街嘅場,就唯有去寶輝閣。佢被評五星地獄嘅原因係佢要入車Lift,仲要係直角擺尾入頭出,仲要高度限制2米。佢嘅好處係夜泊好平同埋真係好近廟街。
4. 佐敦渡華路威信露天停車場 (按我導航)
(2022年5月新開業) 大約位置即係之前巴士總站個位,依家比威信攞咗黎做露天停車場。依家新開場非常平,時租只係$14。無論去圓方定西九文化區,甚至係佐敦都算有睇頭。只要你唔介意行的話。
5. 童軍中心停車場 (按我導航)
上面講到,問十個人有九個會教你泊童軍中心。無他,價錢算合理,又一定有位。而佢最大嘅賣點係有24泊,仲要唔貴。如果你近呢邊嘅就泊啦,否則可以考慮文匯街爛地。至於其餘嗰啲就睇你budget同手車有幾勁喇。彌敦道238號係唔錯嘅,不過太貴啫。
圖片來源:David287x12@香港地方大典