位於大埔林村既香港許願節終於又返黎喇，活動日期係年初一至年十五 (22/1 – 5/2)，而開放時間係每日上午8時30分至傍晚6時30分。以防大家太耐無去而忘記咗，喺新春期間，外來車輛係唔可以行林錦公路，即係去唔到林村的。要去林村就要搭巴士，特別係新春特別路線63R。
咁所以上落車既車站位置，就係你要搵位泊車既地方，本文就係想教大家呢樣野，方便大家安排泊車泊邊好。
首先講番九巴63R，佢係由大埔墟總站開出，經大埔超級城 (其實係大埔太和路原本K12嗰個站)、太和廣場，之後直達林村許願樹。
重點1：不要在大埔墟上車
第一件事要提大家，唔好喺大埔墟站上車！！！以過去咁多年既經驗，特別係年初一至三。大埔墟站要排超過一個鐘先上到巴士，唯一好處係有位坐。不過你排隊企咁耐其實都抵銷咗。
重點2：揸電動車可考慮泊大埔東昌街康體大樓停車場
第二件事，泊去年新開嘅《大埔東昌街康體大樓停車場》，再過條天橋去大埔超級城站上車就近喇。呢度收費又平，紅日每半小時$7啫，仲有60個免費既中速充電器畀你。
重點3：速戰速決，泊太和
第三件事，我本人就多數揀太和上車，因為呢度係室內停車場同室內巴士站，唔怕好天曬落雨淋。同埋呢度係尾站，所以部部巴士埋到黎得番幾個企位，上完就走，速戰速決好多。而太和泊車就無乜得選擇，太和B同太和A兩個領展場就梗架喇，當中近麥當勞嗰邊既太和B場流量會大啲，所以大機會啲有位。另外泊太和可以玩免費泊車優惠，一家人去完林村可以過黎行超市或者食個飯先走，唔消費既，攞佢個電動車泊車優惠亦係唔錯。
另外，去年(2022年) 太和A場新增咗6個Tesla V3 Super Charge，仲有6個Tesla Wall Connector添。不過提提大家，千忻唔好用Super Charge！唔好用Super Charge！唔好用Super Charge！因為由太和上巴士去到林村，分分鐘都塞30-45分鐘，仲未計你要排隊出番黎太和。所以你係唔會趕得切返黎拎車，比人扣逾時收費就無謂喇。
如果有其他泊車問題，歡迎去我地Facebook或者IG度發問架。
註：網絡相片
