海洋公園 / 水上樂園泊車泊邊好？

雖然未知道海洋公園幾時會分拆山上係收費遊戲設施，山下係免費開放畀遊人入場，但係海洋公園作為香港市民既集體回憶，兼且唔少人都有年票，每日都有好多人去。

海洋公園本身有停車場，最方便同最直接就梗係泊返喺海洋公園本身個停車場。不過你需要按職員指示泊邊個位，唔可以自由揀位，咁就有機會唔係泊喺有蓋地方，有可能會需要泊喺露天位置。

退而求其次，就係泊海洋公園站停車場。海洋公園站停車場基本上全部都有蓋，而且好處係可以做原站出入享有免費轉乘優惠（註：原站出入既泊車轉乘優惠已經玩爛咗，下面會有另一教學），大約要泊10個鐘先大約等於泊喺海洋公園本身停車場。所以對於大部分可能只係去海洋公園玩半日既朋友，泊喺海洋公園站會更為化算。不過泊得喺海洋公園站就自然唔可以喺門口上落客，大家都要從海洋公園站行過條天橋，先至可以到達海洋公園入口。

如果你係經由香港仔隧道前往海洋公園站，記得出隧道口靠左往赤柱方向，經過第一個紅綠燈之後會有一個U Turn位，U Turn後靠左行大約150米，就係海洋公園站既入口了。

除左最近既兩個停車場介紹，喜歡日泊既車友，可以繼續睇埋其餘兩個停車場既推介；喺文章既尾部，更加以地圖方式，顯示左不同停車場既位置同距離。

1. 海洋公園停車場（按我導航）
近一定貴。不過，海洋公園停車場可以預先網上預約車位。保證有位。
星期一至五之非繁忙日子，時租收費$25（每日上限$150）
星期六日、公眾假期及繁忙日子，時租收費$40（每日上限$200）

2. 海洋公園車站停車場（按我導航）
一條天橋之隔，所以容易泊滿。假期要一早黎先有位。記住停車場入口喺黃竹坑道，即是如果你係由香港仔隧道出黃竹坑的話係要向赤柱方向行，去到壽山村道調頭，左手邊就見到個入口。
星期一至五，時租收費$25
星期六日及公眾假期，時租收費$35

不過，只要你識運用泊車轉乘優惠，每小時收費可低至$16/$19（以泊好先為準)。
玩法好簡單，先泊車，後去海洋公園站入閘搭一個站去黃竹坑，出閘後再入閘，搭番一個站去海洋公園站。就完成泊車轉乘行為，來回都只不過十蚊以內，所以點計都抵得番條數，最多晒咗你十拎分鐘時間。走既時候，無需做任何登記，直接攞車拍八達通出車就可以。但係記得，搭完港鐵之後，嗰張八達通就唔好再用黎買野食同比錢等等，因為由泊車到攞車之間既使用上限係９次，超過咗個紀錄會無咗，咁就用唔到泊車轉乘架喇。

3. 安盛匯（按我導航）
由第三位開始，我由最平到最貴排列，反正都比較遠。泊車後，搭一個站港鐵吧。步行太遠了。

4. Marina 8（按我導航）
呢個係2021年9月1日先開嘅新場，記住停車場係由業發街入，佢嘅好處係超近黃竹坑港鐵站，一過馬路就係，仲要好平。時租$20，日泊都係$135，不過要留意時間，日泊只係到晚上七點。

5. One Island South停車場（按我導航）
One Island South泊車後，是行是搭港鐵，悉隨尊便。

水上樂園

除直接停泊於水上樂園停車場外，可考慮泊車轉乘以下交通工具。

• 由公園提供之免費接駁巴士服務（往返海洋公園正門及水上樂園，需網上預約）
• 城巴629號線（往返中環碼頭及水上樂園、途經海洋公園）
• 城巴629M號線（由水上樂園至港鐵黃竹坑站，只限回程）
• 專線小巴59S號線特別班次（往返香港仔東勝道及水上樂園）
• 的士乘客上落

1. 水上樂園停車場（按我導航）
水上樂園本身有停車場，但係必須預約，以及只有日泊無時租。但係因為你無得揀，唔通你泊去深灣郵艇會行入去咩。日泊價錢為$200 / $250。

2. 海洋公園停車場或海洋公園車站停車場
基本上水上樂園停車場係有足夠嘅車位俾比你泊嘅。但係如果你唔記得預約或真係無位的話。水上樂園設有免費穿梭巴士俾持有水上樂園入場票嘅人士乘搭。所以你泊番去海洋公園或者海洋公園車站停車場都係一個後備選擇。不過由於座位數量有限，必須於水上樂園網站預約 (按此)。

3. 安盛匯 / Marina 8 / One Island South停車場
泊喺黃竹坑附近嘅停車場，轉的士入去，亦係一個好選擇。大家可以參考上文所介紹既黃竹坑停車場以作安排。

如果你有其他海洋公園 / 水上樂園泊車攻略，歡迎話俾我哋知，集思廣益。

註：相片來源，水上樂園網站

#區區泊邊好

其餘熱門泊邊好文章：
東涌泊車泊邊好？
D2 Place滿晒附近泊車泊邊好？
港外線碼頭搭船去離島玩泊車泊邊好？
全港Donki尋寶地圖
石門泊車泊邊好?
The Wave / 觀塘工業區 泊車泊邊好？