由於2022年7月開始，大嶼山自駕遊推出咗第二階段，有全新既玩法。所以大家請睇下面第二階段嘅玩法先啱。
你唔講我都唔知，原來依家咁多人將自己既全名、車牌連埋屋企地址交比黃牛幫你搶大嶼山自駕遊許可證？你早啲同我講等我教你啦，一定得，我幫朋友搶埋都無失敗過。首先你要知道以下幾點：
一定要係私家車，輕型貨車並不可申請自駕遊只限星期一至五（公眾假期除外），所以唔駛再問星期六日有冇得玩每日只會派發25張證，當中仲有5張係電動車專用，即係汔油車得番20張證咋由於搶大嶼山許可證仲難過機票，所以無日子揀。你今日上午7點正去搶就只可以搶到下個月同一日嘅許可證（即係如果今日係2月10日，就可以搶到3月10日嘅許可證）如上，所以如果今日係1月31日，由於2月無31日嘅關係，即係無得搶；調番轉，2月28日係全年最易搶既一日，因為你可以喺2月28日朝早7點，搶到3月28至31日四日之中嘅一日既許可證（可惜2021年3月28日係星期日，所以今年只搶到3月29日至31日三日之中嘅一日）
睇完以上既要點之後，你揀好日子，較定鬧鐘，朝早七點就去呢個網址搶：https://www.gov.hk/tc/residents/transport/roadandtraffic/lantaupermit.htm
入咗個網之後，如果你好傻咁喺上面呢個畫面度等到7點的話，你已經輸在起跑線，因為呢一頁並唔係起點。
你一路按〝繼續〞再繼續，直至去到上面呢個輸入車牌號碼嘅一頁先係起點。所以你應該預早少少就去到呢頁，入埋車牌同驗證碼再剔埋個聲明，就可以安安樂樂咁等到七點正，就可以按〝繼續〞去搶喇，如果你順利去到下一頁，你已經成功咗一半。
（如果佢寫住 沒有剩餘配額可供預留，請稍後再試。[637-W-0011]，唔好自己嚇自己，只係運輸署個網唔準時啫。你去番上一頁重新黎過試多幾次先好放棄。）
之後嗰頁好似係揀日子既，唔好浪費時間，總之今日就搶下個月同一日，無其他日子比你揀，直接禁落去下個月嗰日度。除非你真係2月28日 (搶3月28日至31日)，或者4月30日等 (搶5月30日至31日) 朝去搶，咁請你一早立定心場揀一日。唔好喺呢個位浪費時間，因為呢個系統亦都無得等你搶完失敗之後再俾你揀過第二日的，請速戰速決！
之後幾頁都係叫你輸入全名、中英文地址、email地址同手提電話號碼。所以你要好似搶機票一樣，預先開定個Word File，入晒上面講既資料。政府輸入地址一般都係三行方式，所以你個地址整定三行就啱架喇，方便到時copy & paste。地區好似係有得揀既，到時執生啦。
最後一個會輸嘅地方，就係輸入信用咭資料太慢。呢個又係同搶機票一樣，你要用一個識自動輸入信用咭資料既瀏覽器，例如Chrome。我自己就係用Chome，當去到輸入信用咭一頁時，Chrome識自動對番位入好晒信用咭號碼同有效期，呢個時候我淨係打安全碼就可以俾錢，又一次贏在起跑線。
再等一陣，你就會收到確認email。咁就知道你成功咗喇！
幾日後，你會收到運輸署寄黎既許可證，如下：
跟住就可以睇定下一篇文章，大嶼山自駕遊泊車泊邊好？睇定你想去邊啲景點同安排泊車地方啦！
如果仲係有問題，或者有唔清楚既地方，歡迎去泊邊好Facebook Page發問，唔好益黃牛呀！